ბათუმის ცენტრიდან 20 კილომეტრის დაშორებით მოხვდები სარფის სანაპიროზე, რომელიც გთავაზობს შავი ზღვის განსაცვიფრებელ ხედებს და საბანაოდ ყველაზე გამჭვირვალე წყალს.

სარფის სანაპიროს სიგრძე მხოლოდ 3 კილომეტრია, თუმცა ის აჭარის საუკეთესო სანაპიროების რიცხვში შედის, რადგან აქ არის ულამაზესი მთაგორიანი ბუნება, წვრილკენჭოვანი სანაპირო და ერთ-ერთი ყველაზე სუფთა და კამკამა წყალი.

სარფის კურორტი სხვა დანარჩენი კურორტების მსგავსად სამკურნალო თვისებებით გამოირჩევა, აღსანიშავია ის ფაქტი რომ ეს ტერიტორია კარგია სასუნთქი გზების და ნერვიული სისტემის დაავადებების მქონე ადამიანებისათვის. ამას განაპირობებს ზღვისპირა ნოტიო სუბტროპიკული ჰავა და სუფთა ზღვა.

სარფში ასევე მდებარეობს საქართველო-თურქეთის საზღვარი და საბაჟო-გამშვები პუნქტი. სარფი საქართველოს ტერიტორიაზე გამავალი ევროპის ავტომაგისტრალის - E70-ის ბოლო წერტილია. გონიო-კვარიათის მსგავსად, სარფის სანაპირო ბოლო ათწლეულებში გახდა პოპულარული.

თუ დაივინგის მოყვარული ხარ სარფის სანაპირო ერთ-ერთია სიაში, სადაც შეძლებ ჩაყვინთო შავი ზღვის ფსკერისკენ, დაკავდე საზღვაო აქტივობით და თვალი შეავლო რიფებსა და თევზებს.