უსაფრთხოება

უსაფრთხოება

საქართველო ერთ-ერთი ყველაზე უსაფრთხო ადგილია მსოფლიოში და სხვადასხვა წლებში არაერთხელ  დაიკავა რეიტინგებში მოწინავე ადგილი. 2022 წელს NUMBEO-მ საქართველო დაასახელა მსოფლიოს ერთ-ერთ ყველაზე უსაფრთხო ქვეყნად,  მე-14 ადგილზე მსოფლიოს მასშტაბით.

2020 წელს  წამყვანმა დამოუკიდებელმა ევროპულმა ორგანიზაციამ, European Best Destinations (EBD), თბილისი ევროპის ყველაზე უსაფრთხო ქალაქად დაასახელა და შედეგად საქართველოს დედაქალაქმა რეკომენდებულთა სიაში პირველი ადგილი დაიკავა. იგივე რეიტინგში ბათუმმა მე-7 ადგილი დაიკავა, როგორც ყველაზე უსაფრთხო მიმართულება ევროპაში.

აჭარაში მოგზაურობისას ნებისმიერ ადგილზე, თავს დაცულად იგრძნობ, რასაც  ადგილობრივი მოსახლეობის სტუმართმასპინძლობა და  კეთილგანწყობაც განაპირობებს. თუმცა,  მიუხედავად იმისა, რომ მცირეა შანსი დანაშაულის მსხვერპლი გახდე, ყველა დანაშაულებრივი ქმედების აღკვეთა შეუძლებელია. შესაბამისად, მნიშვნელოვანია მიმართო „საზოგადოებრივი უსაფრთხოების მართვის ცენტრი 112“-ს დახმარების საჭიროების შემთხვევაში. 

სასწრაფო დახმარება

112 არის „საზოგადოებრივი უსაფრთხოების მართვის ცენტრი“, რომელიც უზრუნველყოფს გადაუდებელი დახმარების გაწევას ნებისმიერი პირისთვის საქართველოს ტერიტორიაზე. 112-ზე დარეკვისას მიიღებ შემდეგ დაუყოვნებლივ დახმარებას:

• პოლიცია

• სახანძრო / სამაშველო

• სასწრაფო სამედიცინო

საჭირო და დროული დახმარების აღმოსაჩენად, ზარის განხორციელებისას ოპერატორს უნდა მიაწოდო შემდეგი ინფორმაცია:

1. რა მოხდა? შემთხვევის ტიპი, რომელი გადაუდებელი სამსახურის დახმარებაა საჭირო

2. სად მოხდა? შემთხვევის ზუსტი ადგილი

3. ზარის ინიციატორის სახელი და გვარი

სასწრაფო დახმარებასთან დაკავშირება: 112-ზე დარეკვა შესაძლებელია, ფიქსირებული და მობილური ტელეფონიდან, ინდექსისა და ქალაქის კოდის გარეშე, მაშინაც კი, თუ ტელეფონი ორმხრივად არის გათიშული და არ დევს სიმ-ბარათი. 

მეტი უსაფრთხოებისთვის, საქართველოს ტერიტორიაზე მყოფ ნებისმიერ პირს, შესაძლებლობა აქვს ჩამოტვირთოს და ისარგებლოს „საზოგადოებრივი უსაფრთხოების მართვის ცენტრი 112“-ის მობილური აპლიკაციით. აპლიკაცია უფასოა და მის ერთ-ერთ მთავარ უპირატესობას მოქალაქის ადგილმდებარეობის განსაზღვრა წარმოადგენს. მას გააჩნია IOS-ისა და Android-ის პლატფორმების მხარდაჭერა და ხელმისაწვდომია, როგორც ქართულ, ასევე ინგლისურ და რუსულ ენებზე. აპლიკაცია აღჭურვილია გახმოვანებით და ადაპტირებულია მხედველობა დაქვეითებული პირებისთვის.

მეტი ინფორმაციისათვის ეწვიე: 112.gov.ge