ლაშქრობა

გრძელი ზამთრის შემდეგ როგორც იქნა გაზაფხულიც დადგა და ისევ მზად ხართ, თბილ ამინდებში მოგზაურობის, ლაშქრობებისა და თავგადასავლებისთვის.
 აჭარის ყველაზე პოპულარული მიმართულებები გაზაფხულის სეზონზე ულამაზესი პეიზაჟებით გამოირჩევა. ტურისტული ცხელი წერტილების უმრავლესობა ივლის-სექტემბერში უფრო დატვირთულია, ამიტომ გაზაფხულზე თქვენი საოცნებო ადგილისკენ გაქცევა შესანიშნავი დროა ხალხმრავლობისგან თავის ასარიდებლად. ეს არის შესანიშნავი შესაძლებლობა, რომ გაეცნოთ ტურისტულ ატრაქციონებს, სანამ ისინი უფრო მშვიდია, ასევე დატკბეთ უფრო მშვიდი გარემოთი ადგილობრივ რესტორნებში, ბარებსა და მაღაზიებში.
რაც არ უნდა მაცდური იყოს ზაფხულის სეზონის შვებულება  - თქვენი დანიშნულების ადგილი შეიძლება იყოს მღელვარე გაზაფხულთან შედარებით.

 დიდ პოპულარულ ქალაქებში ღირსშესანიშნაობების რიგებში დგომის ნაცვლად, ჩვენ გირჩევთ აირჩიოთ სალაშქრო ტურები აჭარის ეროვნულ პარკებში, როდესაც ტემპერატურა ჯერ სასიამოვნოდ თბილია და სიცხე არაა.

გარდა ამისა ამ დროს აღინიშნება გაზაფხულის ტრადიციული დღესასწაულები, მაგალითად აღდგომა, თქვენ შეგიძლიათ აღმოაჩინოთ სრულიად განსახვავებული და ფანტასტიკური გამოცდილებები ამ დროს, რასაც სხვაგან ვერ ნახავთ.

ლაშქრობა ქობულეთის დაცული ტერიტორიაზე

ისპანის სფაგნუმიანი ტორფნარები ბათუმიდან 28 კილომეტრის დაშორებით მდებარეობს და მას იუნესკო იცავს. სანამ იქ წასვლას გადაწყვეტთ, სასურველია ქობულეთის დაცული ტერიტორიების ვიზიტორთა ცენტრს დაუკავშირდეთ, საიდანაც გიდს გაგაყოლებენ. აქვე შეძლებთ ხის თხილამურების დაქირავებას, რაც ტორფნარში გადაადგილებას გაგიადვილებთ. დაცულ ტერიტორიაზეა კოშკურაც, საიდანაც მთელი ტორფნარი ხელისგულივით ჩანს. ამ კოშკურიდან ასევე შეძლებთ დააკვირდეთ გადამფრენ ფრინველებს. თუ ამ საოცარ ადგილს გაზაფხულზე ეწვევით, ენდემური სახეობის კოლხური დუმფარას ყვავილობასაც ნახავთ.
ქობულეთის დაცულ ტერიტორიაზე მოწყობილია ბილიკებიც, თქვენ დაინტერესების შესაბამისად შეიძლება აირჩიოთ საგანმანათლებლო და სამეცნიერო ტურები.

ლაშქრობა მტირალას ეროვნულ პარკში

მტირალას ეროვნული პარკი ცნობილია თავისი მწვანე ბორცვებითა, საოცარი პეიზაჟებითა მდინარეებით.  ჩასვლისთანავე შეგიძლიათ აირჩიოთ რამდენიმე საფეხმავლო ბილიკი, გაემართოთ ჩანჩქერისა და ტბისკენ, სურვილისამებრ აირჩიოთ აქტივობა, როგორიცაა მაგალითათ ზიპლაინი, ლაშქრობის დასასრულს კი დააგემოვნოთ ადგილობრივი ლანჩი.

თუ თქვენ გადაწყვეტთ, რომ მტირალას ეროვნული პარკი მოინახულოთ, არჩევანის საშუალებაც გაქვთ. პარკის ტერიტორიაზე შემუშავებულია ორი - „წაბლნარას“ 7 კილომეტრიანი, მარტივი სირთულის და „ცივწყაროს“ 16 კილომეტრიანი, საშუალო სირთულის ტურისტული მარშრუტი.

აქ გატარებული თითოეული წუთი სასიამოვნოდ გაგახსენდებათ. აუცილებლად უნდა გაითვალისწინოთ, რომ ჭარბტენიანობის გამო ფეხი ადვილად ცურავს, ამიტომ ჩაიცვით კომფორტული ფეხსაცმელი. როგორც უკვე გითხარით ლაშქრობისას თქვენ ნახავთ ტბასა და ჩანჩქერს, რომელიც 15 მეტრის სიმაღლისაა. გირჩევთ არჩევანი არ გააკეთოთ და ორივე მოინახულოთ.

რაც შეეხება ცივწყაროს ბილიკს, ის წაბლნარას ბილიკთან შედარებით უფრო რთულია და განკუთვნილია ხანგრძლივი ლაშქრობის მოყვარულთათვის. ლაშქრობის დასასრულს თქვენ აღმოჩნდებით ზღვის დონიდან 1250 მეტრზე. მანამდე კი გზად შეგხვდებათ კოლხური ტიპის ფართოფოთლოვანი შერეული ტყე, მრავალფეროვანი მცენარეული საფარი და ბუნებრივი წყაროები. თუ გზის გაგრძელებას ცოტა ხნით ვეღარ შეძლებთ, შეგიძლიათ ისარგებლოთ ბილიკის მე-9 კილომეტრზე მოწყობილი ტურისტული თავშესაფარით.

ლაშქრობა კინტრიშის ეროვნულ პარკში

სანამ კინტრიშის ეროვნულ პარკს მოინახულებთ, უნდა იცოდეთ, რომ იქ გამოყოფილია 3 სხვადასხვა ზონა: ბუნების მკაცრი დაცვის ზონა, ვიზიტორთა ზონა და ტრადიციული გამოყენების ზონა. ასევე უნდა გაითვალისწინოთ, რომ აქ გადაადგილება შეიძლება მხოლოდ სპეციალურად გამოყოფილ ბილიკებზე და ასევე თქვენი ვიზიტის მიზანს,საგანმანათლებლო ან სამეცნიერო ინტერესი უნდა წარმოადგენდეს.
კინტრიშის დაცულ ტერიტორიაზე ორი სხვადასხვა სირთულის ტურისტული ბილიკია, თქვენ გადაადგილებას შეძლებთ ცხენებითაც. თუ დრო ამის საშუალებას გაძლევთ, ჩვენ გირჩევთ ორდღიანი ლაშქრობა აირჩიოთ, რომელიც საუკეთესო საშუალებაა მთელი მარშრუტის დასაფარად და ტერიტორიის ბიომრავალფეროვნების აღმოსაჩენად. თუმცა არც ერთდღიანი ლაშქრობა დაგტოვებთ გულგრილს ამ ადგილის მიმართ. მით უფრო თუ გაითვალისწინებთ, რომ ბილიკების გასწვრივ მოწყობილია საპიკნიკე და კემპინგის ადილები, ასევე შეიძლება ცეცხლის დანთებაც სპეციალურად გამოყოფილ ადგილებში.

ასე, რომ თუ თქვენი სურვილი მთიანი რელიეფის, მდინარეების ულამაზესი ხეობებისა და ვიწრო ხევებით დასერილი ტერიტორიების ნახვაა, რომელიც სავსეა ენდემური და უნიკალური ფლორითა და ფაუნით, უნიკალური არქიტექტურული  ნიმუშებით, კინტრიშის ეროვნულ პარკი ყველაზე სწორი არჩევანია.

ლაშქრობა მაჭახელას ეროვნულ პარკში

პარკის ტერიტორიაზე ორი ტურისტული ბილიკია - მთავარანგელოზის 8.3 კმ-იანი ბილიკი სოფ. სინდიეთიდან იწყება და ტყის მასივების, მთის ნაკადულებისა და წყაროების გავლით მთავარანგელოზის მთასთან მიდის. აქედან ჩანს როგორ ერთვის მდინარე ჭოროხი შავ ზღვას. ხელისგულივით მოჩანს ბათუმი, ასევე ქედის, შუახევისა და ხულოს მთებზე შეფენილი სოფლები. თუ გინდათ მთელ აჭარას თვალი გადაავლოთ, აქ უნდა მოხვიდეთ.

ქოქოლეთის ბილიკის სიგრძე 6 კილომეტრია. ამ მარშრუტის გავლა შესაძლებელია ფეხით და მაღალი გამავლობის მანქანითაც. ბილიკის ყველაზე მაღალი წერტილიდან ჩანს ზედა მაჭახელას ხუთი სოფელი, რომლებიც ახლა თურქეთის ტერიტორიაზეა. ეს ხუთი ხევი მაჯისა და ხელის ფორმას ქმნის. როგორც ამბობენ სახელის წარმოშობაც სწორედ ამ სიტყვათა შეთანხმებას უკავშირდება - „მაჯა - ხელა“ ანუ მაჭახელა.
პარკში ბილიკები ისეა მოწყობილი, რომ გიდის გარეშეც არ დაიკარგებით. თუ მარტივ ბილიკზე იმყოფებით, ამას ყვითელი საღებავით მარკირებული ხეები და ქვები მიგანიშნებთ, საშუალო სირთულის ბილიკი წითელი ფერის საღებავით, ხოლო რთული ბილიკი ლურჯი საღებავითაა მონიშნული, ისევე როგორც ზღაპრებში მონიშნული გზები. წყაროებთან ახლოს დასვენებაც შესაძლებელია.