ბათუმის ცნობილი დელფინარიუმის გვერდით სადემონსტრაციო აკვარიუმსაც აღმოაჩენთ, სადაც თქვენს წინაშე საოცარი წყალქვეშა სამყარო გადაიშლება. აქ დაგხვდებათ წყალქვეშა ბინადართა მრავალფეროვნება, რომელიც საინტერესო იქნება ნებისმიერი ასაკის ადამიანისთვის.

ბათუმის სადემონსტრაციო აკვარიუმი 1966 წლიდან ფუნქციონირებს და საკმაოდ რთულ კომპლექსს წარმოადგენს. იგი „შავი ზღვის ფლორისა და ფაუნის შემსწავლელი სამეცნიერო-კვლევითი ცენტრის“ ნაწილია. აკვარიუმებში წყლის საერთო მოცულობა დაახლოებით 200 000 ლიტრს შეადგენს. აკვარიუმში არსებული თევზების უმრავლესობა ადგილობრივად არის გამოყვანილი და გამრავლებული.

ბათუმის აკვარიუმში ამჟამად  შავი ზღვისა და საქართველოს მტკნარი წყლების ბინადართა ზოგიერთი უნიკალური და დეკორატიული თევზების 100-მდე სახეობაა წარმოდგენილი: ზღვის კატა, ზღვის მელა, ცხენთევზა, ხონთქარა და სხვა. აკვარიუმში წარმოდგენილი ეგზოტიკური სახეობებიდან აღსანიშნავია: ამაზონის ბინადარი პირანია, ციხლიდები, სამხრეთ-აღმოსავლეთ აზიის თევზები – გურამი, ბარბუსი, ბოცია, ლაბეო და ულამაზესი დისკუსები. სელექციური მუშაობის შედეგად აკვარიუმში ასევე გამოყვანილია იაპონური კობრი.

ბათუმის აკვარიუმი ზღვის ბინადრების ფართო სპექტრის ხილვის შესაძლებლობაა, რომელიც არ უნდა გამოტოვო.

დამატებითი და პრაქტიკული ინფორმაციისთვის დაუკავშირდით ტურისტულ საინფორმაციო ცენტრებს 577 90- 90- 93/91 ან ეწვიეთ ვებგვერდს VISIT AJARA